Tolosaldeko Hitza

Zazpi Astoren Gainean bertsozaleen taldeak antolatu du Alegiako Udalaren eta San Juan eskola eta Aralar institutuaren laguntzaz. 16 urtetik beherakoen artean bi maila izango dira, eta 16 urtetik gora beste bat.

Alegian bertsozaletasuna beti izan da handia. Bertso eskola osatu zuten duela urte gutxi, zaletasuna beti egon da, eta dagoeneko bi urtez bertso paper lehiaketa antolatu dute: orain lekua hirugarrenari egin diote eta beti bezala, Zazpi Astoren Gainean bertsozaleen taldea da antolatzaile. Laguntzen, berriz, San Juan herri eskola, Aralar institutua eta Alegiako Udala izan dira.
Alegiako III. Bertso Paper Lehiaketako oinarriak zehaztuta daude eta hauek dira aurtengoak: parte-hartzaileak, adinaren arabera, bi taldetan banatuko dira. A taldean 16 urte baino gutxiago dutenak, eta B taldean 16 urte edo gehiago dituztenak. A taldean (gaztetxoenean) bi azpitalde egingo dira saridunak aukeratzerako garaian.
B taldekoak, edo 16 urtetik gorakoek gutxienez bost eta gehienez hamar bertso idatzi beharko dituzte. Bertsoak gai eta doinu librean jarriko dira, baina ezinbestekoa izango da doinuaren izena argi adieraztea. Baldintza horietan, parte-hartzaile bakoitzak nahi adina bertso-sorta aurkeztu ditzake.
A taldekoen baldintzak (DBH artekoena) aurrerago zehaztuko dute, eskolakoekin hitz egin behar baitute adosteko.

Ekainaren 6a baino lehen

Lanak aurkezteko epea zabalik dago, eta azken eguna zehaztu dute: ekainak 6, ostirala. Iaz bezala, aurkezteko garaian bi gutun itxi entregatu beharko ditu bertsolariak. Batean, bertso lana sartuko da eta bestean egilearen izena, helbidea, telefono zenbakia eta beharrezko beste xehetasunak jarriz. Egileak izenordea beharko du eta hau, bi gutunetan agertu beharko da idatzita.
Bertso sorta Alegiako Kultur eta Kirol Etxean entregatuz jasoko dute, edo bestela, helbide elektroniko honetara bidalita: zazpiastorengainean@gmail.com.

Saria banaketa

Maila bakoitzean lehen biak izango dira sarituak. Dena dela, epaimahaiak bertso sortaren batek beste sari bereziren bat merezi badu, banatu egingo du ere.